KAMATI YA LISHE MKOA YAJADILI UTEKELEZAJI WA AFUA ZA LISHE KWA ROBO YA TATU 2025

Imetumwa : June 24th, 2025

Na. Hellen M. Minja

       Habari – DODOMA RS

Kamati ya Lishe Mkoa wa Dodoma ikiongozwa na Katibu Tawala Mkoa wa Dodoma Bw. Kaspar K. Mmuya, Juni 21, 2025 imekutana katika kikao cha kujadili utekelezaji wa viashiria vya Mkataba wa Lishe kwa robo ya tatu (Januari – Machi, 2025) kilichofanyika kwenye ukumbi wa mikutano wa Ofisi ya Mkuu wa Mkoa wa Dodoma kikihusisha Kamati ya lishe na Wadau wanaosaidia utekelezaji wa afua za Lishe.

Kikao hicho kilijadili mambo mbalimbali ikiwa ni pamoja na wasilisho la taarifa ya utekelezaji wa Viashiria vya Mkataba wa Lishe sambamba na taarifa za utekelezaji wa afua za Lishe kwa kipindi cha Januari – Machi 2025 kutoka kwa Wadau wanaotekeleza afua hizo ambao ni ‘Action Against Hunger’ na ‘Counsenuth’.

Mdau ‘Action against hunger’ alitoa muelekeo wake kuhusu utekelezaji wa afua za lishe ambao ni kutoa mafunzo ya usimamizi wa bidhaa za lishe kwa wasimamizi wa ugavi na wale wa vituo vya afya ili kuboresha ufanisi wa utoaji wa huduma za lishe.

Kadhalika Mdau ‘Counsenuth’, alitaja moja ya mafanikio ya Mradi wa Lishe Kijinsia unaotekelezwa Wilayani Chemba kuwa ni kujenga majiko banifu 150 ya kupikia yaliyoboreshwa ambayo hupunguza hewa chafu na moshi ndani ya nyumba, kuokoa matumizi makubwa ya mkaa/kuni na ukataji miti pia kumuwezesha Mama kuwa karibu na Mtoto.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu