MAAFISA MAZINGIRA WAPEWA HEKO NA RAS MMUYA

Imetumwa : May 6th, 2025

Na. Sizah Kangalawe 

       Habari - Dodoma RS

Wataalamu wa mazingira Wilaya za Mkoa wa Dodoma, wamepongezwa kwa juhudi mbalimbali wanazofanya katika kuhakikisha Usafi, ubora na utunzaji wa mazingira unadumishwa na kuendelezwa Mkoani hapa.

Pongezi hizo zimetolewa na Katibu Tawala Mkoa wa Dodoma Bw. Kaspar Mmuya, wakati akifungua kikao kazi cha mapitio ya mpango kazi wa mazingira wa kila Halmashauri, kilichofanyika Mei 6,2025 katika ukumbi wa Mikutano wa Ofisi ya Mkuu wa Mkoa wa Dodoma, Jengo la Mkapa.

‘’Naendelea kuwapongeza wataalamu wote wa Mazingira kutoka katika Halmashauri zetu, ninafahamu kazi nyingi mnazofanya katika kusimamia mazingira. Siwezi kuainisha moja moja najua mna mambo mengi ambayo mnayafanya  kudhibiti uchafuzi wa mazingira ambao unaweza kuathiri udongo, vyanzo vya maji, na hewa.

Aidha Mmuya amewahamasisha Maafisa hao kuendelea kutoa Elimu juu ya utunzaji wa mazingira pamoja namna sahihi ya kutenganisha taka kwa aina zake.

‘’Sasa hiyo yote ni katika kutoa Elimu, tusafishe mazingira yetu na tuwe na uwezo wa kutenga taka, na tuwe na  uwezo wa kuzidhibiti vizuri. Kwahiyo ninawashukuru sana kuwa nyie ndio  wasimamizi wa kitaalam katika Halmashauri zetu".

Kikao hicho kinafanyika kwa usimamizi wa Maafisa viungo wa Mkoa wa Dodoma kutoka Ofisi ya Makamu wa Rais na kinawajumuisha Maafisa mazingira, Maafisa Maliasili wa Wilaya, pamoja na Maafisa mazingira na  Afisa Afya wa Mkoa.

                   ####

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu