MADAKTARI BINGWA WA DKT. SAMIA KUTOA HUDUMA ZA KIBINGWA HOSPITALI ZA WILAYA DODOMA

Imetumwa : June 2nd, 2025

Na. Hellen M. Minja

       Habari – DODOMA RS

Wananchi wa Mkoa wa Dodoma wenye changamoto mbalimbali za kiafya hasa zile za kuhitaji Madaktari Bingwa, wametakiwa kufika kwenye Hospitali zao za Wilaya kuanzia leo June 02, 2025, kwa ajili ya kupata huduma, kwani Wataalamu wa Kibingwa wamefika Mkoani hapa na watakua kwenye Hospitali hizo kwa ajili ya Huduma za Kibingwa.

Hayo yameelezwa na Mkuu wa Mkoa wa Dodoma Mhe. Rosemary Senyamule alipokua akiwapokea ‘Madaktari Bingwa wa Samia’ ambao wamefika ofisini kwake leo tayari kwa ajili ya kutoa huduma kwenye Mkoa wake kwa muda wa siku 06 ( hadi Jumamosi June 07, 2025).

“Madaktari Bingwa watakua katika Hospitali zetu za Wilaya ambapo watawapa huduma kwa ukaribu na kwa unafuu. Kama una ugonjwa wa meno ambao unasema huu ni gharama kwenda hospitali, kama una ugonjwa wa Koo, masikio, Moyo, magonjwa ya kina mama, nenda Hospitali utapewa huduma badala ya kuchelewa fursa hii ambayo itakuwepo tarehe 02 leo mpaka 06”.

Kadhalika, Mganga Mkuu wa Mkoa Dkt. Thomas Rutachunzibwa amesema kwa Mkoa wa Dodoma hii ni awamu ya tatu ambapo awamu mbili zilizofanyika  mwaka jana zilikwenda vizuri na sasa timu hii itakwenda kutoa huduma kwenye Halmashauri 7 za Mkoa huu ambazo ni Bahi, Chamwino, Chemba, Kondoa DC, Kondoa TC, Kongwa na Mpwapwa.

Naye, Mwakilishi kutoka Wizara ya Afya Dr. Mathew Mushi, amesema wamepokea Madaktari Bingwa 50 wa kada mbalimbali ambazo ni Magonjwa ya kina mama, watoto na watoto wachanga, Magonjwa ya ndani, Kinywa na Meno, Mabingwa wa usingizi na ganzi salama, pua, koo na masikio pamoja na Wauguzi Bobezi. Kila Halmashauri itapokea Madaktari 7 ila Mpwapwa itapokea madaktari 8

Hata hivyo, Kiongozi wa Timu hiyo ambaye ni Dkt. Bingwa wa Magonjwa ya ndani Dr. Patrick Bilikundi, amesema Serikali imewekeza katika vifaa tiba ikiwemo dawa na Wataalamu wanashirikishwa kufika sehemu ambazo wananchi wanapata ugumu kutembelea Hospitali kubwa kupata huduma za kibingwa na kibingwa bobezi hivyo wanategemea mwitikio mkubwa kutoka kwa Wananchi wa Mkoa huu.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu