MMUYA AHIMIZA UDHIBITI VIFO VYA MAMA NA MTOTO

Imetumwa : May 26th, 2025

Na. Sizah Kangalawe

 Habari -Dodoma RS

Katibu Tawala Mkoa wa Dodoma Bw. Kaspar Mmuya Mapema Mei 26/2025, amepokea taarifa ya awali ya kazi ya utafiti uliofanyika kwenye Mkoa wa Dodoma kati ya Februari 17 – Mei 11/ 2023  katika Halmashauri za Bahi, Chamwino na Mpwapwa.

Utafiti huo umefanyika kwa ushirikiano wa  Taasisi ya Utafiti wa Magonjwa ya Binadamu (NIMR), OR- TAMISEMI, Wizara ya Afya na Taasisi ya Ifakara Health Institute ikiwa ni kutekeleza utafiti wa kufuatilia ugonjwa wa Malaria Tanzania bara kwa kutumia mbinu za vinasaba.

Akizungumza katika hafla hiyo  Mmuya amewataka waatalamu hao kuhakikisha wanatokomeza kabisa vifo vya  mama wajawazito na watoto walio chini ya Umri wa miaka 5.

‘’Muangalie sana eneo la watoto wadogo chini ya miaka 5, Mimi nazungumza kwasababu nina ‘Interest', nyie wote mnafahamu Mhe. Rais anavyopambana na vifo vya akina mama na watoto,. ndio maana yake kuwa ni lazima tuwalinde hawa, katika utafiti wetu tuangalie kama tunaweza kuwalinda akina mama wajawazito aidha wakipata au wasipate Malaria ni kitu gani tukifanye hawa wawe salama pamoja na watoto waliowabeba’’, amesema Mmuya

Kwa upande wake Mratibu wa Utafiti huo Prof. Deusdedith Ishengoma amesema wamepanga kufanya tafiti katika zahanati 3 zilizopo Mkoani Dodoma, kufanya mafunzo wezeshi vituoni, pia ameweka bayana kuwa wanatarajia kukamilisha zoezi la utafiti huo ndani ya miezi 2- 3.

Waliofika kuwasilisha utafiti huo ni  Prof.Deusdedith Ishengoma, CPA Obedi Olekaondo  na Bi Priscilla Mlay kutoka taasisi ya Ifakara Health Institute (ihi)