MRADI WA KUIMARISHA HUDUMA ZA KIFAFA WAZINDULIWA DODOMA

Imetumwa : May 8th, 2025

Na; Happiness E. Chindiye

   Habari - Dodoma RS

Katibu Tawala Mkoa wa Dodoma Bw. Kaspar K. Mmuya Mei 08,2025 amezindua mradi wa kuimarisha huduma za kifafa Tanzania (Enhancing Epilepsy Care Africa (EECA) ngazi ya Mkoa huu ambao utaenda kutekelezwa katika Wilaya za Chamwino na Bahi.

Uzinduzi wa mradi huo  uliofanyika katika ukumbi wa Ofisi ya Mkuu wa Mkoa unalenga  kuanzisha mfumo endelevu wa huduma jumuishi kwa watu wanaoishi na kifafa Nchini.

Bw.Mmuya akizungumza na hadhira hiyo ametoa wito kwa Jamii  kutowanyanyapaa Watu Wenye Kifafa kwa kuhakikisha wanapata stahiki zote za msingi kama watu wengine.

“ Kuanzia watoa huduma wasiwanyanyapae kadhalika kwenye Jamii watu wenye kifafa wapate haki zote za msingi kusoma, kupata ajira na huduma zote za kiafya” - Amesema Bw. Mmuya

Naye Meneja wa Mradi (EECA) Mradi wa kuimarisha Afya za Kifafa Dodoma Dkt. Dan Bhwana akizungumza wakati wa utambulisho wa mradi huo amesema utaendeshwa ndani ya mfumo wa huduma ya afya ya msingi ili kuhakikisha kuwa huduma hizi zitakuwa  endelevu na kumilikiwa  na jamii husika.

“Mradi huu unalenga kuongeza uelewa wa jamii kuhusu kifafa na kuvunja ukimya unaozunguka hali hii. kupitia  kampeni za kupinga unyanyapaa na shughuli za kinga, tunatarajia kupunguza visa vipya vya kifafa na kuboresha maisha ya watu wanaoishi na hali hii,” amesema Dkt. Bhwana

Kampeni maalum za kuondoa unyanyapaa zitafanyika katika Wilaya za Bahi na Chamwino, sambamba na juhudi za kijamii za kuelimisha jamii kuhusu kifafa na kuboresha mapokezi ya huduma kwa kushirikiana na Wizara ya afya Magonjwa yasiyoambukizwa (NCDs),  Ofisi ya Raisi Tamisemi na Pamoja na wadau wengine wa afya.

&&&

#dodomafahariyawatanzania

#keroyakowajibuwangu

#wekezadodomastawishadodoma

#mtiwangubirthdayyangu