Mwenge wa Uhuru 2017 wamaliza mbio zake Mkoani Dodoma Juni 27

Imetumwa : June 27th, 2017

Uongozi wa Serikali Mkoa wa Dodoma umeungana na Wananchi wa Wilaya Mbalimbali za Mkoa wa Dodoma kumuunga mkono na kumpongeza Rais wa Jamhuri ya Muungano wa Tanzania Mheshimiwa Dkt. John Pombe Joseph Magufuli na Serikali yake ya Awamu ya Tano kwa kuonesha Uzalendo Mkubwa na Jitihada zake za kusimamia Rasilimali za Nchi yetu na kudhibiti wizi na ubadhirifu wa Rasilimali za Taifa, hususani kwenye upande wa Madini.

Salamu hizi za pongezi zimetolewa kwenye maeneo mbalimbali na wananchi wa wilaya za Mkoa wa Dodoma wakati wa mbio za Mwenge wa Uhuru mwaka 2017 ambazo kwa Mkoa wa Dodoma zilichukua muda wa takribani wiki moja kuanzia Juni 19, 2017 na kuhitimishwa leo Juni 27, 2017 na kisha Mwenge kuendelea na mbio zake kwenye Mkoa wa Singida.

Akikabidhi Mwenge na Itifaki yake nzima kwa Mkoa wa Singida, Mkuu wa Mkoa wa Dodoma Mheshimiwa Jordan Rugimbana amemwomba Kiongozi wa Mbio za Mwenge wa Uhuru mwaka 2017 Ndugu Amour Hamad Amour kumfikishia salamu hizo Mheshimiwa Rais Magufuli na kuongeza kuwa mbali na kumpongeza, Uongozi wa Mkoa na Wananchi wanamuombea Mheshimiwa Rais kwa Mwenyezi Mungu na wanamuunga mkono kwa kila Kiongozi kwenye Mkoa kuendelea kusimamia vema majukumu na wajibu wao kwa utiifu, uaminifu na uadilifu.

Mwaka huu 2017 kwenye Mkoa wa Dodoma Mwenge wa Uhuru umekimbizwa kwenye Wilaya zote saba (7) za Dodoma kwa umbali wa Km. 1375 na umepitia jumla ya miradi 55 yenye thamani ya takribani shilingi bilioni 20 ambapo utekelezaji wake umefanikiwa kwa ushirikiano kati ya Serikali Kuu, Serikali za Mitaa, Wananchi na Wadau mbalimbali wa Maendeleo.