NANE NANE KANDA YA KATI KUZINDULIWA NA MHE. DKT. REHEMA NCHIMBI MKUU WA MKOA WA SINGIDA NA MWENYEKITI MWENZA WA KAMATI YA MAONESHO YA NANE NANE KANDA YA KATI AGOSTI 3, 2017

Imetumwa : August 2nd, 2017

Maonesho ya Kilimo na mifugo Nane Nane Kanda ya Kati yanayojumuisha Mikoa ya Dodoma na Singida yanatarajiwa kuzinduliwa na Mkuu wa Mkoa wa Singida ambaye pia ni Mwenyekiti Mwenza wa Kamati ya Nane Nane Kanda ya Kati kesho Agosti 3, 2017. 

Maonesho hayo ya Nane Nane Kanda ya Kati yalianza Agosti Mosi lakini Uongozi wa Mikoa ya Dodoma na Singida uliamua kutumia siku ya Agosti 3, 2017 kufanya ufunguzi rasmi. Kadiri siku zinavyokwenda Maonesho hayo yanazidi kuchanganya kwenye Viwanja vya Nane Nane Nzuguni na idadi ya wananchi wanaokuja kwenye maonesho imeendelea kuongezeka siku hadi siku.

Taarifa iliyotolewa na Mkuu wa Wilaya ya Chemba ambaye ni Kaimu Mwenyekiti wa Nane Nane Kanda ya Kati Mheshimiwa Simon Odunga imeeleza kuwa kwa sasa Maonesho ya Nane Nane Kanda ya Kati yanaratibiwa na kusimamiwa na Serikali za Mikoa ya Dodoma na Singida kufuatia Msajili wa Vyama vya Hiari kuifuta Taasisi ya TASO iliyokuwa ikisimamia Maonesho ya hayo. Tayari Wizara ya Kilimo Mifugo na Uvuvi imeshatoa maelekezo rasmi kwa Serikali za Mikoa ya kusimamia Maonesho ya Nane Nane na imeahidi kuandaa mwongozo wa namna bora ya Serikali za kusimamia na kuendesha Maonesho hayo.

Kaimu Mwenyekiti Mheshimiwa Odunga amesema kuwa maonesho ya Mwaka huu yatajumuisha teknolojia mbalimbali za kilimo, Ufugaji na uvuvi. Aidha, yatakuwa na mashindano maalumu ya mifugo ambayo yatafanyika kwenye Arena Maalum ya Mifugo iliyopo viwanja vya Maonesho Nzuguni hapo Agosti 5, 2017.

Amesema Serikali inataka sera bora zilizopo kwenye sekta ya kilimo na mifugo sasa liwe ni jukumu la Sekretarieti za Mikoa katika kuzisimamia Halmashauri zake za Wilaya kuwezesha wananchi wao kufuga na kulima kisasa kwa kutumia pembejeo na zana bora za kisasa ili kuongeza tija ya uzalishaji kilimo na mifugo ili kuchochea ukuaji wa Sekta ya Viwanda kwa kuzalisha Malighafi ya kutosheleza viwandani.

Mheshimiwa Odunga ametoa wito kwa wananchi wa Mikoa ya Dodoma na Singida na maeneo mbalimbali ya nchi kuendelea kutembelea kwa wingi kwenye viwanja vya NaneNane Nzughuni Mkoani Dodoma ili kujionea na kujifunza masuala mbalimbali ya kilimo na mifugo, lakini amewataka kutembelea Banda la Maliasili na Utalii kujionea wanyama wa porini kama Simba, Chui, Nyati, Fisi, Mamba, Ndege mbalimbali na Nyoka wa aina mbalimbali. Amewataka watumie nafasi hii pia kujifunza utalii wa ndani ili kuchangia kukuza pato la Taifa.