RAIS DKT. SAMIA ASISITIZA KUIMARISHWA KWA KILIMO ILI KUJIHAKIKISHIA USALAMA WA CHAKULA

Imetumwa : June 28th, 2025

Na. Hellen M. Minja

  Habari – DODOMA RS

Matumizi ya mbolea katika kuongeza tija na mnyororo wa thamani kwenye kilimo yametajwa kuwa ni jambo la msingi na linalopaswa kuzingatiwa ili kuimarisha shughuli za kilimo ili kukidhi ongezeko la watu ifikapo mwaka 2050.

Hayo yamebainishwa na Rais wa Jamhuri ya Muungano wa Tanzania Mhe. Dkt. Samia Suluhu Hassan alipokua akizindua rasmi kiwanda cha mbolea cha Itracom kilichopo Nala Jijini Dodoma Juni 28, 2025.

“Upatikanaji wa uhakika wa chakula Barani Afrika, ni jambo muhimu ili kuendana na ongezeko la watu tunao watarajia. Kutokana na hilo, uimarishaji wa shughuli za kilimo ikiwemo matumizi ya mbolea katika kuongeza tija na uzalishaji ni jambo la msingi linalopaswa kuzingatiwa kuanzia sasa”.

Aidha Rais wa Burundi Mhe. Evarist Ndaishimiye ambaye ameshiriki uzinduzi huo, amesema upatikanaji wa mbolea ya kutosha na kwa bei nafuu ni jambo la msingi katika kuongeza uzalishaji wa mazao kwa wakulima hivyo, uwepo wa kiwanda hicho umepunguza kwa kaisi kikubwa gharama ya mbolea kutoka nje na kimeimarisha usalama wa chakula.

Hata hivyo, Waziri mwenye dhamana ya Kilimo Mhe. Hussein Bashe, amesema Serikali inatumia shilingi Bilioni 700 kuwapa Wakulima Ruzuku ya mbolea ambayo imesababisha nchi kutoka kwenye matumizi ya tani 360,000 za mbolea miaka minne iliyopita mpaka tani 860,000 katika msimu wa kilimo uliopita mwaka 2024.

Kadhalika, Mkurugenzi Mtendaji wa Kiwanda cha Itracom Bw. Nduwimana Nazaire, amesema kuwa kiwanda chake kina uwezo wa kuzalisha Tani Milioni 1 za mbolea kwa mwaka zenye sifa ya kuboresha afya ya udongo sambamba na kuongeza mavuno kwa wakulima pia husambazwa ndani na nje ya nchi ya Tanzania.

Nae, Mkuu wa Mkoa wa Dodoma Mhe. Rosemary Senyamule akitoa salam za Mkoa, ameishukuru Serikali kwa kuwekeza miradi mikubwa inayoendelea kuwavutia wawekezaji pia akatoa takwimu ya viwanda vilivyopo Mkoani hapa.

“Sisi Mkoa wa Dodoma tunavyo viwanda vikubwa 12, vya kati 24 na vidogo 3,091 lakini tupo tayari na tunawakaribisha Wawekezaji wengine waje kuwekeza katika Mkoa wa Dodoma.