RAS DODOMA AHIMIZA UENDESHAJI MFUMO ILIYOWEKWA NA COUNSENUTH KUPITIA MRADI WA LISHE KIJINSIA

Imetumwa : June 21st, 2025

Na. Hellen M. Minja

       Habari – DODOMA RS

Katibu Tawala Mkoa wa Dodoma Bw. Kaspar K. Mmuya ametoa maelekezo kwa Halmashauri ya Wilaya ya Chemba, kuendeleza Mifumo iliyowekwa na Wadau wa Lishe ‘The Centre of Councelling, Nutrition and Health Care’ (COUNSENUTH) kupitia mradi wa Lishe kijinsia katika kuimarisha lishe, licha ya mradi huo kufika mwisho .

RAS Mmuya ameyasema hayo wakati wa kikao cha kufunga Mradi huo kilichofanyika katika ukumbi wa ofisi ya Mkuu wa Mkoa wa Dodoma Jijini humu Juni 21, 2025.

“Hata hawa wakisema Mradi huu umefungwa, sisi tutaendeleza kwa sababu tunajua ‘Phylosophy’ ya Mradi, shughuli zilizopangwa na matokeo ya mradi tumeya ‘test’ na tumeyaona na sisi tunajivunia. Tunaposema leo udumavu umepungua kutoa 37.7% mpaka 24.4% maana yake mwakani nikisikia imepanda tena, kutakua na changamoto kwetu sisi wenyewe”. Alisisitiza RAS Mmuya.

Akitoa neno katika kikao hicho, Mshauri Mkuu wa Asasi ya COUNCENUTH Dr. Lunna Kyungu, amesema utekelezaji wa mradi huo katika Kata zote 26 na Vijiji 114 vya Wilaya ya Chemba, umekua na mafanikio makubwa kupitia ushirikiano na sekta za afya, elimu, kilimo, maji, mazingira na maendeleo ya jamii sambamba na ushiriki wa jamii yenyewe.

Kadhalika, Mkurugenzi wa Halmashauri ya Chemba Bw. Hassan Juma Mnyika ameishukuru COUNCENUTH kwa kazi kubwa waliyoifanya hususan katika kupunguza udumavu na kuahidi kuendeleza mazuri yote yaliyofanywa wakati wa Mradi huo kwani tayari wamewajengea uwezo wa kutosha.

Katika hatua nyingine,Afisa lishe Wilaya ya Chemba Bi. Faith Temu ametaja baadhi ya afua zinazotekelezwa na Mradi kuwa ni maadhimisho ya Siku ya Afya na Lishe ya Kijiji (SALIKI) inayotekelezwa kwenye vijiji vyote 114 pamoja na uongozi wa mguso katika vijiji 70 ambapo Viongozi wamejengewa uwezo kuweza kuguswa na changamoto za kijinsia zilizopo kwenye Vijiji vyao.

Asasi ya COUNSENUTH imetekeleza mradi wa Lishe Kijinsia katika Wilaya ya Chemba Mkoa wa Dodoma kwa kipindi cha 2018 - 2025 chini ya ufadhili wa Ubalozi wa Ireland ukiwa na lengo la kupunguza tatizo la udumavu kwa watoto wenye umri chini ya miaka mitano ukiangazia umuhimu wa siku 1000 za mwanzo za Mtoto ambapo sasa umefungwa rasmi.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu