RC DKT. MAHENGE AMSIMAMISHA KAZI DAKTARI WA KITUO CHA AFYA BAHI KUFUATIA MALALAMIKO YA WANANCHI

Imetumwa : May 15th, 2018

MKuu wa Mkoa Dodoma Dkt. Binilith Mahenge ameagiza kusimamishwa Kazi kwa Daktari Lucy Kashinde wa kituo cha Afya Bahi Sokoni ili kupisha Uchunguzi ufanyike dhidi yake kufuatia malalamiko waliyoyatoa Wananchi wa eneo hilo kwa Mkuu wa Mkoa huyo wakati wa Mkutano wake wa hadhara wa kuskiliza Kero za Wananchi kwenye eneo hilo.

Sehemu kubwa ya Malalamiko ya Wananchi kwenye Mkutano huo wa hadhara walimlalamikia Daktari huyo Kuwa amekuwa na Tabia za kuwafanyia ujeuri,lugha mbaya na utovu wa nidhamu Wananchi wanaofika kituoni hapo kupata huduma za Afya hususani wakinamama.

Wananchi wamedai Kuwa Daktari huyo hana kauli nzuri Kwa wagonjwa wanaofika kituoni hapo kupata huduma tofauti na madaktari wengine wa kituo hiko na tabia hiyo ni ya muda mrefu kwa Daktari huyo Jambo lililowafanya Wananchi kumuomba MKuu wa Mkoa Dkt Mahenge kuondoka na Daktari huyo baada ya kumaliza mkutano wa hadhara.

Wakizungumza katika mkutano huo wa hadhara Bi. Mwasiti Masoud na Maria Damiani ambao ni Wakazi  wa Bahi Sokoni wametoa malalamiko yao mbele ya Mkuu wa Mkoa Dkt. Mahenge wamemlalamikia Dkt. Lucy Kashinde kwa matumizi ya lugha chafu Na unyanyasaji kwa wagonjwa hususani kwa akina mama.

Uongozi wa Wilaya ya Bahi umethibitisha Kuwa na taarifa za malalamiko juu ya mtumishi huyo wa kituo cha Afya Bahi na kuwa MKuu wa Wilaya hiyo Mhe. Elizabeth Kitundu  alishamuita mtumishi  huyo  na kumuonya juu ya tabia hizo zilizolalamikiwa na Wananchi lakini bado tabia hizo ziliendelea na Wananchi wameendelea kumlalamikia Daktari huyo.

Kufuatia hali hiyo, MKuu wa Mkoa Dkt. Mahenge ameagiza kusimamishwa Kazi Kwa Daktari huyo na kuagiza Uchunguzi kufanyika juu ya malalamiko hayo na kumtaka MKuu wa Wilaya hiyo kusimamia Jambo Hilo na kumpelekea taarifa.

"Tuna uhaba wa Madaktari lakini hatuwezi kuwavumilia Madaktari watovu wa nidhamu" Dkt . Mahenge alisisitiza.

#ZIARARCDOMWILAYANIBAHI