RC DOM DR. MAHENGE AKUTANA NA KUZUNGUMZA NA WAZIRI WA UJENZI NA UCHUKUZI WA UGANDA MHE. MONICA AZUBA NTEGE

Imetumwa : June 6th, 2018

Mkuu wa Mkoa wa Dodoma Dkt. Binilith Mahenge leo Juni 6, 2018 amekutana na kufanya mazungumzo na Waziri wa Ujenzi na Uchukuzi wa Nchi ya Uganda Mhe. Monica Azuba Ntege Ofisini kwake Jijini Dodoma ambapo Waziri huyo amepongeza jitihada za Serikali ya Tanzania za Ujenzi wa Reli ya Kisasa ya Umeme - SGR.

Waziri Ntege amesema kuwa mradi huo wa Reli ya kisasa ya Umeme inayojengwa na Serikali ya Tanzania ina umuhimu mkubwa kwenye shughuli za kiuchumi na usafirishaji wa mizigo ikitokea bandari ya Dare es Salaam kuelekea ukanda wa ziwa Victoria kupeleka mizigo hiyo nchini Uganda; na kuwa inaweza pia kuhudumia nchi zingine za jirani kama Rwanda, Burundi na Jamhuri ya Kidemokrasia ya Kongo.

Waziri Ntege pia amepongeza ushirikiano mzuri uliopo baina ya Rais John Pombe Magufuli wa Tanzania na Rais Yoweri Kaguta Museven wa Uganda na kusema kuwa ushirikiano huo utazinufaisha nchi hizi mbili kwenye nyanja mbalimbali za uchumi na maendeleo na kuongeza kuwa ipo haja ya Serikali yao ya Uganda kukaa na kuwafahamisha Wafanyabiashara wa Uganda namna watakavyonufaika na Reli ya Kisasa ya Umeme ya Mwendo Kasi-SGR inayojengwa hapa Tanzania mara itakapokamilika ujenzi wake.

Kwa upande wake Mkuu wa Mkoa wa Dodoma Dkt. Binilith Mahenge amemfahamisha Waziri Ntege kuwa Jiografia ya Mkoa wa Dodoma kuwa katikati ya nchi inatoa urahisi wa kuzihuduma nchi za jirani kama Uganda, Rwanda, Burundi na jamhuri ya Kidemokrasia ya Kongo ukilinganisha na mikoa kama Dar es Salaam.

Dkt. Mahenge ameongeza pia miradi ya ujenzi inayotekelezwa na Serikali kama huo wa Reli ya kisasa ya umeme na Mradi wa Uwanja wa ndege wa kisasa wa Msalato ambao tayari serikali inatarajia fedha za ujenzi wake zitatoka benki ya maendeleo ya Afrika na Mpango wa Mamlaka ya Bandari TPA kujenga Bandari Kavu Mkoani Dodoma; kwa apamoja miradi hii inazidi kuiongezea Mkoa wa Dodoma uwezo wa kuzihudumia nchi hizo za jirani kwa shughuli za kibiashara na uchumi.