RC SENYAMULE AMTAKA MKANDARASI WA UCHIMBAJI WA VISIMA VYA UMWAGILIAJI KUKAMILISHA MRADI KWA WAKATI

Imetumwa : February 6th, 2025

Na. Francisca Mselemu

      Habari - Dodoma RS

Mkuu wa Mkoa wa Dodoma, Mhe. Rosemary Senyamule amemtaka Mkandarasi wa kuchimba visima vya umwagiliaji katika Mkoa huu, kuhakikisha kuwa  anakamilisha mradi huo kwa wakati ili wakulima waweze kunufaika na uwekezaji ambao ni muendelezo wa jitihada za Serikali ya Daktari Samia Suluhu Hassan  kukuza sekta ya kilimo pamoja na kuwainua Wakulima Kiuchumi.

Mhe. Senyamule ameyasema hayo  wakati wa hafla ya  makabidhiano ya eneo kwa ajili ya uchimbaji wa kisima cha umwagiliaji liyofanyika katika Mtaa wa Chamwino kata ya Chihanga, Jijiini Dodoma.

"Tumeambiwa mradi huu utachukua miezi sita (6) tu, leo ni mwezi wa pili, mwezi wa Nane (8) mradi huu unatakiwa uwe umekamilika. Sisi mradi huu ni kati ya vipaumbele vya Mkoa wa Dodoma, tungetamani mradi huu ujengwe kwa wakati, tungetamani mradi huu uishe kwa muda uliokusudiwa. Nimeambiwa hili hapa ni soko. Mradi ukamilike, hili soko lianze kupata bidhaa nyingi, kwa sababu ni kubwa, magari yawe yanapaki hapa.

"Na bahati nzuri, wewe ndio umepewa mradi huu mkoa mzima, tunasema Dodoma ni fahari ya Watanzania, sisi tunataka uifaharishe Dodoma. Miradi ya Elimu, miradi ya Afya, Dodoma tumepata tuzo kwa kufanya vizuri. Sasa hatutamani mradi huu wanakuja kusema wapi pamekamilika, Dodoma hakujakamiika.'' Amesisitiza Mhe. Senyamule.

Akimkaribisha  Mkuu wa Mkoa, Katibu Tawala Mkoa wa Dodoma, Bw. Kaspar Mmuya amewasisitiza Wananchi kuwa kaulimbiu ya Mkoa  ya mwaka 2025 ni Umasikini sasa Basi, na kwamba kaulimbiu hiyo inatekelezwa kwa vitendo kwa kuhakikisha Wananchi wa Dodoma ambao wengi wao  ni wakulima, wanalima kilimo cha uhakika na chenye tija.

Naye  Meneja wa Umwagiliaji mkoa wa Dodoma, Mhandisi Oswald Urassa, amesema mradi huo ni utekelezaji wa maelekezo ya Mhe. Rais ambapo unatarajiwa kunufaisha wakulima 27,600 nchi nzima, huku  kila Halmashauri ikitarajiwa kupata visima kumi(10). Katika awamu ya kwanza vitachimbwa visima sabini(70), Mkoa wa Dodoma utapata visima sita (6) ambavyo vitachimbwa katika wilaya za Kondoa, Bahi, Kongwa, Chemba, Chamwino na Dodoma.

Kwa upande wake, Diwani wa Kata ya Chihanga amemshukuru sana Mhe. Rais kwa mradi huo, ambao amesema kwamba  utamfanya apate usingizi kwani siku zote amekuwa akiwaza  kuhusu Wananchi  wa kata yake wanaojishughulisha na kilimo cha umwagiliaji  mbao wamekuwa wakikabiliwa na changamoto kubwa ya uhaba wa maji kutokana na kisima wanachokitegemea  ndicho kinachotumika kwa matumizi mengine ya kibinadamu ya wakazi wa eneo hilo.