SERIKALI MBIONI KUJENGA BARABARA YA MPWAPWA - KONGWA - MBANDE KWA KIWANGO CHA LAMI

Imetumwa : June 23rd, 2025

Na. Hellen M. Minja

       Habari – DODOMA RS

Serikali ya awamu ya sita chini ya Rais Mhe. Samia Suluhu Hassan, tayari imetoa fedha zinazohitajika kwa ajili ya  ujenzi wa Barabara ya Mpwapwa – Kongwa  - Mbande kwa kiwango cha lami, ili kumaliza kabisa kadhia wanayoipata wananchi wa Wilaya ya Mpwapwa Mkoani Dodoma kutokana na matumizi ya barabara hiyo.

Katibu wa NEC, Itikadi, Uenezi na Mafunzo wa Chama Cha Mapinduzi (CCM) Taifa, CPA Amos Makalla ameyasema hayo alipokua akizungumza kwenye Mkutano wa hadhara na wakazi wa Wilaya hiyo na Wilaya jirani ya Kongwa Juni 23, 2025 katika eneo la Mnara wa Mashujaa Mpwapwa Sokoni.

“Mhe. Dkt. Samia Suluhu Hassan, tayari ametoa fedha zote zinazohitajika kwa ajili ya ujenzi wa barabara hii ya Mpwapwa - Kongwa mpaka Mbande kwa kiwango cha lami. Mkandarasi tayari amepatikana na maandalizi ya ujenzi yanaendelea.

  Hatua hii ni ushahidi wa dhamira ya CCM na Serikali yake katika kuwaletea Maendeleo Wananchi”.

Aidha, ametaja mafanikio mengine yaliyotekekelezwa na Serikali katika Mkoa wa Dodoma chini ya Mhe. Rais Samia kuwa ni elimu bila malipo, ujenzi wa vituo vya afya, upatikanaji wa umeme vijijini pamoja na ujenzi wa madaraja, huku akisisitiza kuwa Serikali ya chama chake imeacha alama kwenye kila sekta Nchini.

Hata hivyo, Mbunge wa Jimbo la Kibakwe na Waziri wa Ofisi ya Rais - Utumishi na Utawala Bora Mhe. George Simbachawene ametaja maendeleo yaliyoletwa na Serikali kwenye Jimbo lake hususan ujenzi wa miundombinu ya barabara ikiwemo ile ya lami yenye urefu wa KM 3 ambayo haikuwahi kuwepo awali ikiwa na taa za barabarani na ujenzi wa KM 1 nyingine kukamilisha KM 4 unaendelea.

Jimbo la Kibakwe pekee limepatiwa fedha kiasi cha Shilingi Bilioni 3.2 kwa ajili ya kutekeleza miradi ya maendeleo ambapo kwenye sekta ya elimu wameongeza shule za msingi mpya 11 ambapo awali zilikua 65, shule za sekondari 10 mpya zikiwa na miundombinu yake ya maabara ambapo awali kulikua na shule 12 huku umeme ukifika kwenye vijiji vyote 113 vya Jimbo hilo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu