SOKO LA MACHINGA DODOMA KUANZISHA DAWATI LA KIJINSIA KUPAMBANA NA UPOTEVU WA HAKI

Imetumwa : May 12th, 2025

Na. Hellen M. Minja

       Habari – DODOMA RS

Mkurugenzi wa Jiji la Dodoma ameelekezwa kuhakikisha kuwa soko la wafanyabiashara wadogo wadogo Jijini Dodoma maarufu kama ‘Machinga Complex’ linakuwa na dawati la jinsia ndani ya kituo kidogo cha Polisi kilichopo sokoni hapo ili kukabiliana na vitendo vya upotevu wa haki ya kijinsia.

Maelekezo hayo yametolewa Mei 12, 2025 na Mkuu wa Mkoa wa Dodoma Mhe. Rosemary Senyamule alipokua akizindua rasmi Umoja wa Wanawake Machinga Dodoma (UWAMADO) katika hafla iliyofanyika kwenye viwanja vya soko hilo Jijini Dodoma.

“Kama hapa kuna viashiria vya kupoteza haki ya kijinsia, hakikisheni leo tarehe 12, 05 hadi tarehe 30, Dawati la kijinsia liwe limeanzishwa hapa ili muweze kupata haki sawa. Nchi yetu haitaki kupendelea mtu mmoja, wanaume au wanawake, inataka wote wapate haki sawa, kituo cha Polisi tayari kipo hivyo, unao mwanzo wa kuanzia ili hili liweze kutokea”.

Akizungumza na wanawake hao pamoja na hadhira iliyojitokeza kushuhudia uzinduzi huo, Mbunge wa Dodoma Mjini na Waziri wa Nishati Mhe. Anthony Mavunde amesema Jiji la Dodoma limetenga shilingi Bilioni 7 kwa ajili ya kutoa mikopo kwa akina Mama, vijana na watu wenye ulemavu hivyo ameyataka makundi hayo kuchangamkia fedha hizo.

Nae, Meneja Msaidizi wa Soko la Machinga Bw. Mbwana Kasonta, amemshukuru Rais Dkt. Samia Suluhu Hassan kwa kuwajengea soko hilo ambalo limepunguza adha ya kupigwa na jua pamoja na mvua mitaani hivyo limeongeza wateja wa kudumu sambamba na kuliweka Jiji katika hali ya usafi.

Awali, akisoma risala ya Umoja huo, Katibu wake Bi. Mariam Kajembe amesema, Umoja wao una ndoto ya kuanzisha SACCOS ili kupambana na ukosefu wa mitaji rafiki kwa ajili ya kufanyia biashara kwani wamekua wahanga wa kukosa mitaji ya kuendeshea biashara ambapo kuunga mkono hilo, zimetolewa shilingi Milioni 4 kuanzisha SACCOS hiyo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu