UBORESHAJI WA DAFTARI LA KUDUMU AWAMU YA PILI ; WANANCHI WA WATAKIWA KUJITOKEZA

Imetumwa : May 12th, 2025

Na; Happiness E. Chindiye

    Habari - Dodoma RS

Wananchi Mkoani hapa wamesisitizwa kujitokeza kwenye uboreshaji wa daftari la kudumu la mpiga kura awamu ya pili utakaofanyika kuanzia tarehe 16  hadi 22 Mei, 2025 katika vituo vilivyo pangwa kwenye maeneo yao.

Hayo yameelezwa Leo tarehe 12 Mei,2025 na Mkuu wa Mkoa wa Dodoma Mhe. Rosemary S. Senyamule wakati alipokutana na waandishi wa habari katika Ukumbi wa Mikutano wa ofisi yake,  Jengo la Mkapa Jijini Dodoma.

“Nawasihi wanadodoma wote wenye sifa wafike kwenye  vituo kuhakiki taarifa zao na kuendelea kufuatilia taarifa zinazotolewa na Tume huru ya uchaguzi “ - Amesema Mhe.Senyamule

Mhe. Senyamule amesema uboreshaji huo ni sehemu muhimu ya mchakato wa uchaguzi na unalenga kuhakikisha wapiga kura wote wanahakiki taarifa zao.

“Ni muhimu kwa wapiga kura kuhakikisha kuwa taarifa zilizopo kwenye daftari la kudumu la mpiga kura ni sahihi ili waweze kutimiza haki yao ya kupiga kura katika uchaguzi Mkuu wa mwaka huu 2025” - Amesisitiza

Hata hivyo Mkuu wa Mkoa huyo ameeleza  uboreshaji huo utafanyika katika Mkoa wote huu ambapo idadi ya vituo kwa Mkoa mzima ni 413, huku idadi kwa kila Halmashauri ikiwa kama ifuatavyo;Chemba vituo 58, Jiji la Dodoma vituo 105, Kongwa vituo 41, Mpwapwa vituo 67, Bahi vituo 32, Kondoa Vijijini Vituo 44, Kondoa Mji vituo 16 na Chamwino vituo 50.

Aidha, Vituo hivyo vitakuwa katika Ofisi za Watendaji wa Kata ambapo kwa kata ambazo ni kubwa, utaratibu umeshafanyika, vituo vimegawanywa,hivyo kutakuwa na vituo kwenye ofisi za kata na katika maeneo mengine ambayo Wananchi watatangaziwa   na Viongozi wao wa Kata, Mitaa/Vijiji.

Uboreshaji wa daftari awamu hii unahusisha kuandikisha wapiga kura wapya (wenye umri wa miaka 18 na kuendelea ambao hawajajiandikisha, na watakaotimiza miaka 18 kabla ya tarehe ya uchaguzi Mkuu wa mwaka 2025), kukagua daftari, Wapiga kura kuhakiki taarifa zao, Kufanya marekebisho ya taarifa pamoja na kuweka pingamizi kwa wapiga kura wasio na sifa kuendelea kuwemo kwenye daftari.

&&&

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu