UONGOZI WA EWF OFISINI KWA KATIBU TAWALA WA MKOA WA DODOMA

Imetumwa : September 20th, 2023

Uongozi wa Taasisi inayojitegemea ya Ealvine Walingozi Foundation (EWF) ukiongozwa na Mwenyekiti wao Bi. Caroline A. Sanga, leo Septemba 20 umemtembelea Katibu Tawala Mkoa wa Dodoma Bw. Ally Gugu kwenye Ofisi yake iliyopo jengo la Mkapa na kufanya mazungumzo kuhusu hafla yao waliyoiandaa kwa lengo la kuwakutanisha watoto yatima na wenye ulemavu waishio Mikoa wa Dodoma na Manyara itakayofanyika tarehe 5 Desemba 2023 kwenye ukumbi wa Mabeyo huku mgeni rasmi akitarajiwa kuwa Waziri Mkuu wa Tanzania Mhe. Kassim Majaliwa (Mb.)

Shughuli hiyo itaambatana na mada mbalimbali kutoka kwa wataalamu kama vile Madaktari

na wanasaikolojia kwa dhumuni la kuwaonyesha walengwa kuwa nao ni jamii muhimu kama walivyo binadamu wengine. Pia msisitizo utatolewa kuwa wazazi wote waliowazunguka ni wazazi wa jamii nzima na wapo kwa ajili yao licha ya kutokuwa wazazi wa kibaiolojia.

Mratibu wa hafla hiyo Bi. Emmiliana M. Nkuu, ametoa rai kwa taasisi mbalimbali, viongozi wa kisiasa, Serikali na kidini kushiriki pamoja kwani kutakua na chakula cha pamoja na zawadi kama vile vifaa vya shule kwa watoto, tuzo pia zitatolewa kwa watu wanaochangia jamii hizi katika Taifa letu.

Amesema baadhi ya watoa burudani watakaopamba shughuli hiyo ni kikundi cha JKT Makutupora, mwanamuziki Jose Mara, mchekeshaji maarifu nchini Elliud pamoja na mshereheshaji wa hafla hio anatarajiwa kuwa mtangazaji wa Clouds Media Group Bi. Gea Habibu.

MWISHO