USALAMA BARABARANI WATAKIWA KUWA JAMBO LA KIMKAKATI KUPUNGUZA AJALI ZA BARABARANI

Imetumwa : June 19th, 2025

Na. Hellen M. Minja

       Habari – DODOMA RS

Imeelezwa kuwa jukumu la usalama barabarani linapaswa kuwa la pamoja na la kimkakati ili kupunguza madhara yanayotokana na ajali za barabarani. Hayo yamebainishwa na Katibu Tawala Mkoa wa Dodoma Bw. Kaspar K. Mmuya alipokua akifungua kikao chechemuzi kuhusu Mradi wa Usalama Barabarani kwa Jamii-Mkuza wa Bomba la Mafuta Ghafi Afrika Mashariki (EACOP).

Kikao hicho kimefanyika leo Juni 19, 2025 kwenye ukumbi wa Mikutano wa Hoteli ya Vizano Jijini Dodoma, kikiangazia mambo kadha wa kadha yanayohusu Usalama Barabarani kwenye barabara zilizopitiwa na Mradi wa Bomba la Mafuta Ghafi ambapo kwa Mkoa wa Dodoma limepita kwenye Wilaya za Chemba na Kondoa.

“Inaonesha dhahiri kuwa, jukumu la usalama barabarani linapaswa kuwa la pamoja na linalohitaji Mkakati kamili na ubunifu wa hali ya juu kupunguza madhara yanayotokana na ajali za barabarani, hivyo ni muhimu kwa ushuhuda wa dhati na dhamira yetu ya kukuza na kujenga miundombinu sahihi kwa jamii yetu kwani inaacha alama endelevu juu ya elimu ya usalama barabarani”.  Bw. Mmuya.

Aidha, Mratibu wa Usalama Barabarani kutoka Shirika la AMEND kwenye Mradi wa Bomba la Mafuta Ghafi Bi. Suzana Hamaro ameeleza kuwa, kipengele kikuu cha Mradi ni shughuli za usalama barabarani kwa ngazi ya jamii ambapo wanatoa elimu ya usalama barabarani shule za msingi na sekondari sambamba na kuangalia makundi hatarishi.

Akizungumza kwa niaba ya Mkuu wa Usalama Barabarani Mkoa wa Dodoma, Mkaguzi Msaidizi wa Jeshi la Polisi Tamim Songoro, amesema Jeshi lake linashirikiana na AMEND kutoa elimu juu ya usalama wa barabarani hasa kwa watembea kwa miguu ambao ndio wahanga wakubwa wa ajali za barabarani kwa kutofahamu sheria za usalama barabarani.

AMEND ni Shirika lisilo la kiserikali linalojishughulisha na utoaji wa elimu ya usalama barabarani likifanya kazi katika nchi zaidi ya 10 Barani Afrika, kwa lengo la kuboresha hali ya usalama barabarani, kwani jambo hilo ni janga la Kimataifa. Nchini Tanzania Mradi huo umepita kwenye Mikoa 8 ikiwemo Kagera, Geita, Shinyanga, Tabora, Singida, Dodoma, Manyara na Tanga.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu