WALIMU NGAZI YA AWALI NA MSINGI WAPEWA MAFUNZO YA ELIMU JUMUISHI

Imetumwa : June 18th, 2025

Na:Sofia Remmi.

Habari:Dodoma Rs

Walimu ngazi ya awali na msingi Jijini Dodoma wamepatiwa mafunzo yanayolenga kuwasaidia watoto wenye mahitaji maalum.

Afisa Elimu kata ya Ng’ong’ona ambae pia ni Mwezeshaji wa Mafunzo ya Elimu Jumuishi Mwl.Prosper Paskari ameleza juu ya mafunzo hayo kuwa na umuhimu kwa walimu ili kuwawezesha kuongeza uelewa juu ya namna ya kutoa huduma kwa Watoto wenye mahitaji maalumu.

Mafunzo hayo yamefanyika leo tarehe 18 Juni 2025 katika shule ya awali na msingi Mtemi Mazengo Jijini Dodoma.

Akizungumza wakati wa mahojiano, Mwl.Pascal amesema lengo la Mafunzo hayo ni kupata maarifa ya kuweza kuwasaidia watoto wenye mahitaji maalumu.

“Siku ya leo walimu wamepewa mafunzo na kujua nini maana ya Elimu Jumuishi,suala la ulemavu na kuweza kubainisha kati ya Mlemavu wa Akili na wanafunzi wenye Mahitaji Maalumu na kuweza kubainisha makundi mbalimbali”.

“Mwalimu anapokuwa shuleni katika hatua za mwanzo kabisa anatakiwa awafanyie nini watoto na watatumia Mbinu gani za kuwabainisha wanafunzi wenye mahitaji maalumu na kujifunza mbinu mbalimbali za kufanya uchunguzi juu ya watoto hao” Amesema Pascal.

Kwa upande wake Mwl.Happiness Baltazal Minja kutoka Shule ya Msingi Iyumbu iliyopo kata ya Iyumbu amesema Mafunzo hayo yameweza kunufaisha utendaji kazi zaidi mara baada ya kurudi katika majukumu yake kwa kutambua watoto wenye mahitaji maalumu na kuweza kuwasaidia kuendana na mazingira.

Mafunzo hayo ya siku mbili yalioanza leo,yatahitimishwa  kesho.