WAMILIKI WA VITUO VYA KULELEA WATOTO WADOGO MCHANA WAHIMIZWA KUVISAJILI KUEPUSHA WATU WASIO SAHIHI

Imetumwa : June 21st, 2025

Na. Hellen M. Minja

       Habari – DODOMA

Wamiliki wa vituo vya kulelea watoto wadogo  Mchana, wametakiwa kuvisajili  vituo hivyo, ili kuepusha hatari ya kutokuwa na watu sahihi katika eneo la  malezi na Makuzi ya watoto.

Hayo yamebainishwa na Katibu Tawala Mkoa wa Dodoma Bw. Kaspar K. Mmuya katika kikao cha kujadili utoaji wa huduma ya malezi, makuzi na maendeleo ya awali ya mtoto katika vituo vya kulelea watoto wadogo mchana kilichofanyika kwenye ukumbi wa ofisi ya Mkuu wa Mkoa wa Dodoma Jijini hapa Juni 21, 2025 kikiwahusisha wamiliki wa vituo hivyo.

“Ninasikitika kuwa katika vituo 243, vituo 167 havijasajiliwa, maana yake inawezekana havijakidhi vigezo, na kitu kimoja kikubwa ninachokiogopa ni kuwa na watu wasio sahihi katika eneo la makuzi na malezi, kulea watoto katika mfumo huu ambao Serikali imeweka ni kazi kabisa anasomea mtu”. Bw. Mmuya.

Aidha, Bw. Mmuya amesisitiza kuwa Mkoa hautafurahia kuwa na vituo ambavyo havijasajiliwa, hivyo amewataka Wamiliki wa Vituo hivyo ambavyo havijasajiliwa, kujitafakari baada ya kikao hicho kwa kukubaliana muda, na kama kutakua na changamoto yeyote wasisite kuwasiliana na Msajili ili awasaidie kupita kwenye hatua za usajili.

Awali, akiwasilisha changamoto katika uanzishwaji na uendeshwaji wa vituo hivyo, Afisa Ustawi wa Jamii Mkoa wa Dodoma Bi. Josephine Mwaipopo, ametaja moja ya changamoto kuwa ni uwepo wa vituo vilivyoanzishwa kiholela ambavyo mazingira yake ni hatarishi kwa maisha ya watoto ikiwa ni pamoja na kukosekana kwa mazingira rafiki.

Naye, Mwenyekiti wa wamiliki wa Vituo vya Kulelea Watoto Wadogo Mchana Mkoa wa Dodoma Bi. Rehema Mdengede, amesema watu wengi wamekua wakianzisha na kuendesha vituo hivyo bila kufuata kanuni na taratibu,  hali iliyosababisha kutokea kwa matukio ya kikatili wanayofanyiwa watoto kwenye baadhi ya vituo hivyo.

Vituo vya kulelea Watoto Wadogo Mchana vimeanzishwa kwa Sheria ya Mtoto Na. 21 ya 2009 iliyofanyiwa mapitio 2019 pamoja na Kanuni ya uanzishaji na uendeshaji wa Vituo hivyo ya mwaka 2020 inayosema “mahali palipoandaliwa kwa ajili ya malezi wakati wa mchana kwa watoto wenye umri usiozidi miaka mitano na usiopungua miwili” na huanzishwa na kuendeshwa na watu binafsi, taasisi zilizosajiliwa, Mashirika yasiyo ya Kiserikali, Mashirika ya Dini pamoja na Taasisi za Serikali.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu