WANANCHI WAHAMASISHWA KUPINGA MATUMIZI YA DAWA ZA KULEVYA

Imetumwa : June 20th, 2025

Na. Hellen M. Minja

       Habari – DODOMA RS

Wananchi wamehamasishwa kupinga matumizi ya Dawa za Kulevya kwani zina athari kubwa kwenye mifumo ya fahamu ya binadamu. Hamasa hiyo imetolewa na Mganga Mkuu wa Mkoa wa Dodoma,Daktari Thomas Rutachunzibwa wakati wa zoezi la usafi wa mazingira ya Hospitali ya Rufaa ya Mkoa wa Dodoma leo Juni 20, 2025.

Zoezi hilo la usafi limeandaliwa kwa lengo la kutoa hamasa kwa Wananchi, kuelekea kilele cha maadhimisho ya  Siku ya Kupiga vita dawa za kulevya Duniani ambayo huadhimishwa Juni 26,kila mwaka ili waweze kushiriki maadhimisho hayo yatakayofanyika katika Ukumbi wa Kituo cha Mikutano cha Jakaya Kikwete Jijini Dodoma.

“Kabla ya siku yenyewe, zimepangwa shughuli mbalimbali, ikiwa ni pamoja na zoezi hili la leo, ambapo kupitia shughuli hizo tunatoa jumbe za kuhamasisha jamii kutotumia dawa za kulevya lakini wale ambao wametumia dawa hizo, waelimishwe namna gani ya kupata matibabu ili waweze kuondokana na hilo tatizo”.

Akizungumza kwa niaba ya Kamishna Jenerali wa Mamlaka ya Kudhibiti na Kupambana na Dawa za kulevya, Kamishna wa Kanda ya Kati Bw. Joseph P. Kisusi amesema Mpango wa matibabu kwa waraibu wa dawa za kulevya unasaidia kupunguza madhara ya dawa hizo kwa wale ambao tayari wameathirika kwani kwa sasa wengi wanajitokeza kutokana na juhudi za Serikali kudhibiti uingizwaji wa dawa hizo Nchini.

Aidha baadhi ya wananchi  walioshiriki zoezi hilo la usafi , wameipongeza Serikali kwa juhudi hizo kwani matumizi ya dawa za kulevya yanaharibu vijana ambapo wengi walioathirika hugeuka kuwa mzigo kwa wazazi.Sambamba na pongezi, wameiomba Serikali kuendelea na mapambano dhidi ya mianya ya dawa hizo kuingia au kuzalishwa, ili kuwa na kizazi imara siku za usoni.

Maadhimisho ya Siku ya Kupiga vita Dawa za Kulevya Duniani 2025 yanaambatana na shughuli mbalimbali zilizoandaliwa na Mamlaka yenye dhamana kwa kushirikiana na Ofisi ya Mkuu wa Mkoa wa Dodoma,ikiwa ni pamoja na mabonanza ya michezo, kushiriki usafi kwenye maeneo ya kijamii na kutoa elimu kwa makundi ya mitaani pia kupitia vyombo vya habari juu ya athari za  dawa hizo.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu