"WAWEKEZAJI JITOKEZENI KUWEKEZA JIJI LA DODOMA"RC SENYAMULE

Imetumwa : October 1st, 2022

Mkuu wa Mkoa wa Dodoma Mhe.Rosemary Senyamule ameyasema hayo wakati wa ziara ya kutembelea miradi mitatu iliyoanzishwa na Halmashauri ya Jiji la Dodoma ambayo ni City Hotel, Stendi kuu ya Mabasi Nanenane na soko la Job Ndugai.

Lengo la kutembelea miradi hiyo ni kukagua maendeleo yake na kuangalia kama lengo la kuanzishwa kwa miradi hiyo linatekelezwa kwani kuna baadhi ya miradi imekamilika lakini haifanyi kazi kama ilivyokusudiwa.

 “Kutokufanya kazi kwa miradi iliyoanzishwa kwa kodi za wananchi, ni kuwakosea wananchi kwani ni mali yao.Majengo mengi ambayo yamejengwa ndani ya miradi kwa lengo la uwekezaji, bado hayafanyiwi kazi ikiwemo soko kuu la Job Ndugai, stedi kuu ya mabasi Nanenane nafasi zipo ila wawekezaji hakuna. Natoa wito kwa wawekezaji kujitokeza kwa wingi ili maeneo yote yafanyiwe kazi kama matarajio yaliopo” Amesema Senyamule.

``Serikali ilitarajia kupata mapato mengi kutokana na miradi hii lakini hali imekua tofauti kwani mapato ya sasa hayana uwiano na ukubwa wa miradi, kuna mambo madogo madogo kama utunzaji wa mazingira ni muhimu kwani kipo ndani ya uwezo wetu na ni suala la kupanga watu kuweza kuweka mazingira safi kulingana na hadhi ya eneo”  Amesisitiza Mhe Senyamule.

 Aidha,Mkuu wa Mkoa amehimiza uhamasishaji kwa njia ya matangazo hasa sehemu zilizo wazi kwa ajili ya kuvutia wawekezaji kwani kuna kumbi kubwa na zinazofaa kwa ajili ya kufanyia mikutano na shughuli mbalimbali na zipo eneo zuri la mjini. Pia kuna maduka ambayo bado hayajapata wawekezaji na wanatakiwa kuja haraka kwani hii itasaidia kupata mapato ambayo yataboresha huduma za jamii.

Hata hivyo, Kaimu Mchumi wa Jiji la Dodoma Bw. Amani Ng’oma ameongozana na Mkuu wa Mkoa kwenye ziara hiyo, amezungumzia suala la madereva wa stendi kuu ya nanenane ambao hawaitumii stendi hiyo jambo ambalo linapoteza lengo la uwepo wake.

``Tunaomba msaada wako Mkuu wa Mkoa hasa kwa madereva wa mabasi makubwa ya abiria wanaokwenda au kuingia kutoka mikoa mbalimbali waweze kufuata utaratibu uliopo katika stedi hii kwani itapunguza changamoto ambazo zinazojitokeza kwa wananchi kwa kuwa kituo hiki kimejengwa kwa ajili yao na kwa fedha nyingi lakini wao wanakiuka taratibu za upakiaji na ushushaji abiria ndani ya kituo kwani usalama wao upo ndani kituo hiki``amesema Ng`oma.

MWISHO