DHAMIRA YA MHE.RAIS , WATANZANIA KUPATA HUDUMA YATIMIA KWA MKOA WA DODOMA

Imetumwa : May 22nd, 2025

Na. Hellen M. Minja

       Habari – DODOMA RS

Dhamira ya Rais wa Jamhuri ya Muungano wa Tanzania Mhe. Dkt. Samia Suluhu Hassan kuona Viongozi wa Wilaya wanawatumikia Watanzania kwa dhati, bila vikwazo, imetimia leo Mei 21, 2025 kwa Mkoa wa Dodoma kukamilisha magari ya Wakuu wa Wilaya zote saba, ambapo Mkuu wa Wilaya ya Dodoma amekabidhiwa gari mpya.

Makabidhiano hayo yamefanyika nje ya Ofisi ya Mkuu wa Mkoa wa Dodoma na baada ya makabidhiano hayo, Mkuu wa Mkoa Mhe. Rosemary Senyamule akapata wasaa wa kuzungumza machache juu ya dhamira ya Mhe. Rais.

“Wakuu wa Wilaya zote saba za Mkoa wa Dodoma wamekamilika kupata magari ndani ya huu mwaka mmoja wa fedha (2024/2025). Tunajua jambo hili ni dhamira yake ya dhati kuona Viongozi hawa wanawatumikia Watanzania kwa dhati kabisa, bila kikwazo cha kuwafikia vijijini, milimani, mabondeni, magari haya yanafika”.

Kwa upande wake Katibu Tawala Mkoa wa Dodoma Bw. Kaspar K. Mmuya, amemtaka Dereva wa gari hilo kulitunza na kufuata sheria, kanuni na taratibu za usalama barabarani, kwa kuzingatia mafunzo yaliyotolewa hivi karibuni kwa madereva wa magari ya Serikali.

“Haya ambayo utakwenda kuyafanya ni matokeo ya mafunzo haya, nakukumbusha tu kulinda usalama wako na mali ya Umma, na usiwe mfano bora wa kuvunja sheria za barabarani. Matumizi ya ving’ora na taa za vimulimuli yamekatazwa, kwa hiyo ukisimamishwa na Polisi,simama, msikilize kisha songa mbele, usimkatalie Polisi kutimiza wajibu wake hata kama hakuna kosa”.

Mnamo Mei 17, 2025, Kamanda wa Polisi Mkoa wa Dodoma  SACP George Katabazi, aliitisha kikao maalumu kwa Madereva wa Magari ya Serikali kilichokwenda sambamba na mafunzo yaliyotolewa juu ya kuzingatia sheria, kanuni na taratibu za usalama barabarani kutokana na malalamiko yanayoelekezwa kwa Madereva hao juu ya uvunjifu wa sheria za barabarani.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu