SUALA LA AMANI SI LA KISERIKALI TU BALI NI LA KIIMANI KUPITIA VITABU VITUKUFU

Imetumwa : October 26th, 2025

Na. Hellen M. Minja

       Habari – DODOMA RS

Suala la Amani na mshikamano limeendelea kuwa ajenda kuu ya Mkoa wa Dodoma hasa kwa makundi ya Madhehebu ya Dini ambapo inasemekana kuwa suala hilo si la Kiserikali bali ni la Kiimani bila kujali itikadi za Dini, ambalo limejidhihirisha kupitia vitabu vitukufu vya Mwenyezi Mungu.

Hayo yamebainishwa na Mkuu wa Mkoa wa Dodoma Mhe. Rosemary Senyamule wakati wa hafla ya Maulid ya kumbukizi ya Mazazi ya Mtume Muhammad (S.A.W) iliyokwenda sambamba na Dua maalum ya kuliombea Taifa zikiwa zimebaki siku chache kuelekea uchaguzi Mkuu, iliyoandaliwa na Jumuiya ya Wanawake wa Kiislam Tanzania (JUWAKITA) kwenye viwanja vya Msikiti wa Gaddafi Jijini Dodoma Oktoba 26, 2025.

“Wanawake tunasema Tanzania tunaomba umoja, wa Kitaifa, tunaomba mshikamano, tunaomba watu wapatane, sisi ni wamoja haijalishi Dini zetu, makabila, vyama vyetu vya siasa. Lakini leo pia kitabu hiki cha Mwenyezi Mungu kinatuambia maneno haya haya ya upatanisho, niwaombe wanawake wa JUWAKITA tuwe mbele, tuwaambie wengine maneno haya kwani si ya Serikali bali ya kiimani”,

Aidha, Katibu wa Chama Cha Mapinduzi Mkoa wa Dodoma Bi. Pili Mbanga, amewasisitiza Wanawake  hao kuungana kuombea amani kwani wao pamoja na watoto,ndio waathirika wakubwa  pindi inapotoweka,huku akiwaomba kukaa na vijana majumbani na kuzungumza nao wasirubuniwe na maneno ya mitandaoni yanayohamasisha uvunjifu wa amani.

Vilevile, Mlezi wa JUWAKITA Kanda ya Kati Bi. Fatma Msindi, amesema kabla ya kuzungumzia amani kwa ujumla, amani kubwa ni ile ya nafsi ya mtu kuhakikisha ipo salama na kuongeza kuwa, amani haiwezi kupatikana kwenye nafsi ya mtu kama mtu huyo hajajitambua, kubadilika na kuacha mazoea.

Akitoa shukrani kwa Mgeni rasmi, Mwenyekiti Mtawala wa JUWAKITA Mkoa wa Dodoma Bi. Aisha Mjegere ametoa witi kwa kila mwanamke atakayetoka hapo kwenda na kauli ya Viongozi hao ambayo ni kudumisha amani, kwani inapokosekana anayeathirika ni mwanamke hivyo, amewataka kuheshimu walichopewa na Mwenyezi Mungu.

#DodomaFahariyaWatanzania

#KuraYakoHakiYakoJitokezeKupigakura

#NimejiandikishaNitapigaKura

#UmejiandikishaKapigeKura