WAHITIMU WA ELIMU YA JUU WAASWA KUCHANGAMKIA FURSA ZILIZOPO DODOMA

Imetumwa : October 23rd, 2025

Na Bilali A. Juma

   Habari - DODOMA RS

Wanafunzi wa Vyuo vya Elimu ya Juu Dodoma pamoja na Wahitimu waliokuwa Viongozi wa Serikali za Wanafunzi katika Vyuo hiyo,wamemtembelea Mkuu wa Mkoa wa Dodoma Mhe. Rosemary Senyamule ofisini kwake,jengo la Mkapa Jijini Dodoma Oktoba 22, 2025.

Lengo la ziara ya Vijana  hao ni kujitambulisha  kwa Mkuu wa Mkoa,kueleza shughuli wanazozifanya,malengo waliyonayo kwa siku za usoni,sambamba na kutaka kufahamu fursa zilizopo,ambazo wanaweza kuzitumia kujiajiri na kuajiri vijana wenzao.

Akizungumza na Vijana hao Mhe. Senyamule amesema kuwa mazingira ambayo yametengenezwa,yameifanya Dodoma kuwa Mji wa kipekee na wakuvutia,wenye  fursa,wenye amani,wenye mambo mengi mazuri.Na kwamba anafurahi kuona kuwa  wameshaanza kuziona fursa hizo.

"Lakini pia ukiijua mipango ya Dodoma utaona kuwa Dodoma inatarajiwa kuwa Mji mzuri sana Tanzania,na  huenda ikawa sio Tanzania tu,hata  Afrika.Utakuja kuwa mji wa kipekee kutokana na mipango iliyopo.Tunayaona machache; Mji wa Serikali ni wa kipekee,mahakama ni ya kipekee,barabara ya mzunguko ni ya kipekee,Ikulu iko hapa.

Kwa hiyo yako mambo ambayo yameanza kuonekana ya kipekee.Lakini ukisikia mipango inayokuja; treni ya 'local motive' barabara zetu zitatanuliwa kwenda airport,SGR,nyie ni  Wanavyuo mtakuwa mnafahamu kuwa Chuo kikubwa kabisa Afrika cha IT  kinaanza kujengwa pale Nala,na ramani wameshatutolea,sasa hivi wanatuonyesha kuwa mwaka huu imeshaanza kuwekwa kwenye bajeti.Kwa hiyo ukiiona Dodoma unaona kabisa kwamba ni mahali penye fursa nyingi"Amesema Mhe. Senyamule.

Aidha Mhe. Senyamule amewaasa vijana hao kuwa waaminifu kwani ,uaminifu ni kitu ambacho vijana wengi wa sasa hawana,hali inayowasabisha kukosa fursa nyingi kutokana na kutokuaminiwa.

Vijana hao ambao wametoka vyuo mbalimbali vilivyopo Dodoma wamepata nafasi ya kuzungumza na Mkuu wa Mkoa na kuelezwa juu ya fursa zilizopo.

Miongoni mwa fursa walizoelezwa ni zile zilizopo katika sekta ya Utalii, ambapo wameaswa kuwa mstari wa mbele kuzijua na kuzichangamkia,  ili wasikae mitaani na kuilaumu Serikali kuhusu ajira.

#DodomaFahariyaWatanzania

#KeroYakoWajibuWangu

#NimejiandikishaNitapigaKura

#UmejiandikishaKapigeKura

#KuraYakoHakiYakoJitokezeKupigaKura