SERIKALI KUANZA UJENZI SHULE YA SEKONDARI LOJE

Imetumwa : October 27th, 2025

•Itaanza kutumika Januari 2026

• Wazazi wasema,itawaondolea watoto wao adha ya kutembea umbali mrefu kufuata elimu ya  Sekondari Vijiji Jirani.

Na: Elizabeth Dai

Habari Dodoma Rs

Serikali imeahidi kuchukua hatua za haraka kuhakikisha changamoto ya kukosekana  kwa shule ya Sekondari katika kijiji cha Loje, wilayani Chamwino, inatatuliwa mara moja kupitia ujenzi wa shule mpya ya sekondari katika eneo hilo.

Akizungumza na wananchi wa kijiji hicho, Katibu Tawala wa Mkoa wa Dodoma, Dkt. Khatibu Kazungu, amesema Serikali imejipanga kuhakikisha wananchi wote wanapata huduma bora katika sekta zote muhimu, ikiwemo elimu.

“Serikali inakusudia kuhakikisha inawaletea wananchi wake maisha bora katika sekta zote. Sasa nimesikia kuna changamoto ndogo ya elimu wananchi wa Loje mnayo, nimekuja hapa kwa niaba ya Mkuu wa Mkoa kuwahakikishia kwamba Serikali ipo pamoja nanyi,” alisema Dkt. Kazungu.

Dkt. Kazungu aliongeza kuwa Serikali imeamua kuharakisha mchakato wa ujenzi wa shule hiyo ili wanafunzi wa eneo hilo waanze masomo mapema iwezekanavyo katika shule hiyo.

“Nitumie nafasi hii kuwahakikishia kuwa ujenzi wa Shule ya Sekondari Loje unaanza mara moja. Iwe jua, iwe mvua, ujenzi unaanza haraka sana,” alisisitiza Dkt. Kazungu

Kwa upande wake, Mkurugenzi Mtendaji wa Halmashauri ya Chamwino, Bw. Tito Mganwa, alisema maelekezo ya Serikali ni kuhakikisha shule hiyo inakamilika kwa muda mfupi ili iweze kupokea wanafunzi mwezi Januari mwakani.

“Maelekezo ya Serikali ni kwamba sekondari hii mwezi wa kwanza inapokea wanafunzi. Kazi yangu ni kuratibu, kazi yenu ni kutoa ushirikiano, na tunaanza leo kwa kufanya usafi wa mazingira ili wataalam wanapokuja 'kuseti' ramani wakute pako safi,” alisema Bw. Mganwa.

Aidha, imebainika kuwa kata ya Loje imetenga jumla ya hekari 24.6 kwa ajili ya ujenzi wa shule hiyo, hatua inayothibitisha ushirikiano wa karibu kati ya wananchi na Serikali katika kutatua changamoto ya upatikanaji wa elimu.

Wananchi wa Loje wamepokea kwa furaha hatua hiyo ya Serikali, wakisema shule hiyo itasaidia kupunguza changamoto ya watoto wao kutembea umbali mrefu kufuata elimu ya sekondari katika vijiji vya jirani na kuipa thamani kata hiyo iliyoanzishwa kwa zaidi ya miaka 20 iliyopita.

Ujenzi wa Shule ya Sekondari Loje unatarajiwa kuanza rasmi ndani ya siku chache zijazo, ukiwa ni sehemu ya mpango wa Serikali wa kuboresha miundombinu ya elimu katika maeneo ya vijijini Nchini.